Rutas de sendeirismo

PR-G 169 Ruta Fervenza das Hortas (Arzúa)

O percorrido iniciase na capela de Fonte Santa, na estrada que vai de Arzúa ao encoro de Portodemouros. Entre os puntos principais destacan o Torrente de Maroxo, que termina no couto do mesmo nome e ofrece unha panorámica única de Arzúa; o encoro de Portodemouros; o museo do mel O Enredo do Abelleiro e, finalmente, a espectacular Fervenza das Hortas, de 30 metros de altura e límite natural entre Arzúa e Touro. Esta ruta pódese facer en sentido inverso, comezando na Fervenza das Hortas, como se explica neste enlace.

Dende a Fervenza das Hortas pódese continuar polo PR-G233 ata a desembocadura en Touro do río Lañas no Ulla, enlazando neste punto co PR-G 121, que a súa vez conecta co PR-G 93, permitindo facer un percorrido paralelo ao Ulla, augas abaixo, duns 40 quilómetros ata o concello de Boqueixón.
+ info

PR-G 129 Senda Rodís-Xesteda (Cerceda)

O sendeiro pode iniciarse en dous puntos: na Igrexa de San Martiño de Rodís, unha pequena xoia da arquitectura tradicional, ou na de Santa Comba de Xesteda. Entre paisaxes agrarias e forestais, a ruta atravesa lugares como as pontellas dos ríos Pazos e Cerdeira; Astande de Arriba, onde hai un gran hórreo, ou a Casa da Barrosa.
+ info

PR-G 130 Senda Meirama-Xalo-Meirama (Cerceda)

 

O sendeiro ascende os montes do Xalo pola ladeira sur, un terreo máis chairo que a cara norte da serra. Ao norte do Coto do Río, a escasos 400 metros deste PR-G, está situada a Pedra de Mazafacha, límite común dos municipios de Cerceda, Carral e Culleredo e fonte de numerosas lendas.
+ info

PR-G 131 Ruta Cerceda-Portobrea (Cerceda)

 

Son puntos de interese desta ruta a Igrexa de San Martiño de Cerceda, o bosque de ribeira do río Tourío, o monte da Revolta, as ribeiras do río Lengüelle e a praia fluvial e área recreativa de Portobrea. No bosque fluvial que se pode ver nesta ruta predomina o ameneiro, aínda que tamén están presentes os salgueiros.
+ info

PR-G 117 Ruta da Fraga aos muíños (Mesía)

 

Ruta deseñada para por en valor a paisaxe e o patrimonio natural, histórico, arquitectónico e etnográfico de Mesía. Ao longo do camiño visítanse catro muíños tradicionais restaurados e dotados con paneis informativos: o da Ribeira, o de Queiroa, o do Batán e o da Cubela.
+ info

PR-G 238 Rúta dos petróglifos (Teo)

 

Pola gran densidade de xacementos de mámoas e petróglifos existentes e polas características destes gravados, este sitio arqueolóxico representa unha das áreas de maior importancia en Galicia. A ruta achégase aos petróglifos do Rio de Angueira, Outeiro do Corno ou Pena Bicuda de Regoufe e de Loureiro, entre outros. Recoméndase facela de noite para admirar os petróglifos á luz das lanternas.
+ info

PR-G 125 Sendeiro de Visantoña (Santiso)

A maior parte do percorrido faise por pistas de terra, polo medio de pradeiras. Entre os puntos de interese desta ruta destacan o Pazo Vilar de Ferreiros, o conxunto de Muíños do Tajo, así como os restos das sepulturas megalíticas do Ribeiro, as mámoas ou as vistas do encoro de Portodemouros, construído nos anos 60 sobre o río Ulla.
+ info (Wikiloc)

PR-G 226 Ruta da Beseña (Santiso)

 

Percorrido lineal de 37,78 km ao carón do río Ulla, recomendado para facer en bicicleta. Ten como punto de saída O Muiño dos Enmeigados, en Barazón Grande, transcorre na parte final preto do encoro de Portodemouros, onde se atpa o único ferri de augas doces de Galicia, que, de forma gratuíta, cruza aos viaxeiros dende Santiso ata Vila de Cruces, na provincia de Pontevedra.
+info (Wikiloc)

PR-G 235 Sendeiro de Sobrado dos Monxes (Sobrado dos Monxes)

 

Tamén coñecido como roteiro da ‘Pena Moura’, este sendeiro discorre entre pradarías e pequenos vales fluviais ata ascender á Serra do Bocelo, onde está a Pena da Moura. O percorrido ten como puntos de interese a Lagoa de Sobrado, o Forno dos Mouros e o Mosteiro de Santa María de Sobrado. Ademais, desde o Coto dos Tarbos obtense unha boa panorámica sobre a parte norte das terras do alto Tambre. O dolmen de Forno dos Mouros, no concello de Toques, atópase moi preto desta ruta, e nel pódese enlacasr coa PR-G 168.
+ info (Wikiloc)

PR-G 166 Ruta das Fervenzas (Toques)

 

A senda nace preto da Ponte da Grela, na capital municipal, e discorre paralela ao río Furelos en dirección á Serra do Careón, que forma parte da Rede Natura 2000. No primeiro tramo hai unha variante de 2,1 km que leva por un contorno máis agreste. É apta para facer a cabalo ou en bicicleta e conecta cos PR-G 167 e PR-G 168, permitindo combinar itinerarios. Ademais do seu valor paisaxístico e natural, un dos principais atractivos é a fervenza das Brañas, cunha caída de auga de 20 metros de altura e un antigo muíño.
+ info

PR-G 167 Ruta da Ermida (Toques)

 

O percorrido comeza por un tramo lineal que logo se converte en circular, pode realizarse en 3 horas ou combinarse co PR-G 166 e PR-G 168
O punto de partida sitúase a 250 m da Ponte da Grela. No alto da Serra do Careón, desde o cruceiro da ermida de San Cidre divísase unha boa panorámica da contorna, que forma parte da Rede Natura 2000 e conta con especies endémicas. O camiño segue polos cumios en dirección a San Xiao, onde se poden visitar a ermida, a carballeira, a Casa Grande do Herdeiro e o castro.
+ info

PR-G 168 Ruta dos Megalitos (Toques)

 

Poderíase considerar unha ruta circular, aínda que hai unha diferencia duns 900 metros entre o punto de inicio, en Mirallos, e o de final, no monte do Peneiral, que se pode facer de forma illada ou combinándoo cos PR-G 166 e PR-G 167, que transcorren pola serra do Careón, catalogada como Lugar de Importancia Comunitaria.

Ademais das espectaculares vistas panorámicas desde a serra do Bocelo, o atractivo principal desta ruta é o dolmen de Forno dos Mouros, un dos monumentos megalíticos máis importantes de Galicia, que conserva case a totalidade das súas pinturas.
+ info

PR-G 121 Ruta dos Tres Ríos (Touro)

 

O percorrido pasa polas parroquias de Touro, Fao, Cornado e Novefontes, paralelo na maior parte do percorrido aos ríos Lañas, Beseño e Ulla nun continuo e leve descenso que remata na Ponte Basebe, que comunica Touro con Vila de Cruces. Tamén se pode facer en sentido inverso.

O sendeiro ofrece espazos naturais de gran beleza e, ademais, permite observar numerosos muíños, o primeiro deles o muíño da Carballa, no quilómetro dous. A fervenza coñecida como o Salto das Pombas, cunha caída desde 10 metros de altura, é outro dos atractivos desta ruta.
Na desembocadura do río Lañas conecta co PR-G 233 e, en Ponte Basebe, co PR-G 93
+ info

PR-G 93 Ruta da Ribeira do Ulla (Touro)

 

Tomando como punto de partida a Ponte Basebe, o camiño discorre pola marxe dereita do Ulla, tendo ao río como principal protagonista. Camíñase por sendas de pescadores entre bosques de ribeira, restos de muíños e abandonadas ouriceiras ata aproximarse á fermosa paraxe da fervenza do Inferniño, os muíños de Quintas e as ruínas do Pazo de San Cristovo, antes de atravesar a vaira do Pozo do Pego e rematar na estrada a San Pedro de Ribeira.

Conecta do PR-G 121, que permite seguir ao carón do Ulla ata a desembocadura do Lañas, aquí enlazar co PR-G 233 ata fervenza das Hortas, xa no límite co concello de Arzúa e, dende aquí, continuar polo PR-G 169.
+ info (Wikiloc)

PR-G 233 Ruta da Fervenza das Hortas ao Río Lañas (Touro)

 

Sendeiro que, combinado co PR-G 169 e co PR-G 121, permite completar os 40 km da ribeira do Ulla no Concello de Touro, entre Arzúa e Boqueixón.

O camiño discorre por fragas e bosques de ribeira e descobre elementos naturais e patrimoniais como fervenzas, pontes, muíños, fontes ou lavadoiros. Un desvío opcional dun quilómetro dende Os Chaos conduce ao petróglifo de Pena Furada.
+ info

PR-G 36 Sendeiro de San Xoán da Cova (Vedra)

 

A ruta lineal discorre pola marxe dereita do río Ulla, aproveitando camiños de paso e sendas de pescadores. Parte dende o miradoiro de Gundián en San Xoán da Cova, aos pés do impresionante viaduto do tren a 50 metros sobre o río Ulla, para alcanzar o núcleo urbano da Ponte Ulla e continuar pola área recreativa de Agronovo, o couto de Ximonde e finalizar na área de recreo de Cubelas.
+ info (Wikiloc)

PR-G 195 Muíños do Río das Gándaras (Vilasantar)

Paseo fluvial polos ríos Cabalar e das Gándaras, afluentes do Tambre que separan Vilasantar de Boimorto, que comeza no muíño do Ponte Sapo. No percorrido pódense ver unha ducia de muíños, entre os que destaca o batán de Mezonzo. Xunto coa fervenza e co serradoiro, este muíño forma un fermoso enclave dun gran valor etnográfico e cultural.